Este** miti ëëts exa nëmatyä'äkwampy miti ëxäm yik tëëtëp yik amtootëp yë uunk, yë unä'äjk ja äp matyä'äky uk jaa, ja äp yë'yëny, mäy ääy xa yä'ät näxwiinyët xëëwë kutsääy ji'ijy, porque** jate'n ijty ja tsääy tëëyëp, tëëyëp ka'ap jaa të n'ijxy ka'ap ëts ja të najääwë nayëte'n, pës** ja majääytyëjk jate'n ja' të tjääk nëmatyä'äktëj, pës** mäyä'ät yääj të yë'ëtyëj të nyäxtë xäm ja majääytyëjktëj ku jate'n ijty ja juuyën akäpxën tmëët'ätëj, wënäktëp yäj jaa kään, wënäktëp yäj ja moojk refresco**, mezcal**, cervesë** tsu'utsy tii jaty wënäktë, kuts ja jam y'ats wënpetë jam päntëkupäkp, mikyëxp jëts ja kafe** wepaktojmëtëj, pës** may jääy ja y'ijty ja määtëp pokxtëp, xäm ëxem tu'uk jë tsa'änk jam wemp perë** ka' yë myajatä'äky tum yääj jaa, në'ääjy tuu'ääjy ja jyëën'unk, ja tyeky unk tyik'ëyëtë, nëkxtëp exep'ampy xap jok'apy akupäjky, mäj japyëj, yë wa' yëë escuelë** tëjk, yë' y'anikijxy jap ijty tyäntë jaa ja mitleñostëj** ja akäts jäätyëj ja'atëj may'ampy ja burrë** myët'äjtëp kapääy** myët'äjtëp, kuts jap kyatänë jëts jam nyäj.... nyëkxtë jam, majääy tyun'akëm, jamts ja tyäntëj, jam tsyoonkojmëtë, jëts jam tuknëëm tyëk jä'ätëj ja kafe** jamts ja' nëmeenypyëknëtëj, uk jamts ja tooknëj, uk jamts ja', pyujxy ja ta'aujkënyëtëj pënë sutsë jam tyik tuuyë'ëytyëj përë** jate'n ja të wye'ey tëj tyuuyë'ëy uk jate'ntsën ja tëëj y'ity ja tunk, ja pëkj të tyik yë'ëtyëj ja majääytyëjk jate'n ja tijy jyuky'atëj, të tiknäxtë ja xëëw ja tyëmpo**, pës** jate'nts yä'ät xäm nëmatyä'äky yë'ëpëj ääw, yë'ëpëj ayuujk, yë'ëpëj wënmääny, xämts yä'ät ëts nëmatyä'äky wa nxëëw'atypy Octaviano Martínez Vásquez.